Elias Krasniqi
Misioni i NATO-s në Kosovë, KFOR, ka deklaruar zyrtarisht se aktualisht nuk ka ndryshime të rëndësishme në praninë e tij ushtarake, pavarësisht tensioneve globale dhe thirrjeve provokuese në rrjetet sociale.
Sipas KFOR-it, forca dhe qëndrimi i tyre rishikohen dhe përshtaten periodikisht në përputhje me zhvillimet në terren për të siguruar përmbushjen e mandatit për një mjedis të qetë dhe të sigurt. Ky reagim erdhi pas raportimeve për thirrje nga përdorues serbë në platformat “X” dhe “Telegram”, të cilët i kërkonin Iranit që, pas sulmeve ndaj bazave amerikane në Lindjen e Mesme, të godasë edhe bazën ushtarake amerikane Bondsteel në Kosovë, duke shpërndarë madje edhe koordinatat e sakta të kampit.
Në strukturën aktuale të misionit, Italia mban numrin më të madh të trupave me mbi 900 ushtarë, ndërsa Shtetet e Bashkuara vazhdojnë të luajnë një rol kyç me rreth 600 trupa të dislokuara. Në total, KFOR-i numëron mbi 4,600 trupa nga vende të ndryshme anëtare dhe partnere të NATO-s. Nga ana tjetër, Ministria e Mbrojtjes e Kosovës ka bërë të ditur se nuk ka pranuar informacione zyrtare për kërcënime konkrete lidhur me këto thirrje virtuale, por situata po monitorohet me kujdes të shtuar.
Si pasojë e zhvillimeve të fundit në Lindjen e Mesme, Qeveria e Kosovës mblodhi Këshillin e Sigurisë të shtunën mbrëma. Në këtë mbledhje u theksua se institucionet e sigurisë po ndjekin me vëmendje çdo lëvizje dhe mbeten të palëkundura në krah të aleatëve strategjikë, veçanërisht SHBA-së.
Edhe pse aktualisht situata vlerësohet e qetë, rritja e retorikës nxitëse online tregon për një tentativë të hapur të luftës hibride për të përfshirë Kosovën në narrativat e konflikteve të largëta gjeopolitike.
