Agjenti i BIA-s pranon akuzat për spiunazh, dënohet me pesë vjet burgim

Me pesë vjet burgim është dënuar të enjten Aleksander Vlajiq, për veprën penale “spiunazh”.

Ndërsa, për veprën penale “armëmbajtje pa leje” u dënua me 1000 euro gjobë.

Vlajiqit iu caktua dënimi pasi e kishte pranuar fajësinë në marrëveshje me Prokurorinë Speciale.

Ai është i dënuari i parë për spiunazh qëkur Kosova e ka shpallur pavarësinë.

Vlajiç ishte arrestuar në qershor të vitit 2024, me dyshimin se kishte mbledhur dhe dërguar informacione te Agjencia e Inteligjencës dhe Sigurisë së Serbisë.

Sipas Prokurorisë, ai kishte krijuar një rrjet të të punësuarve të nacionalitetit serb, prej të cilëve kishte pranuar informacione dhe raporte mbi punën e organizatave ndërkombëtare në Kosovë.

Sipas aktakuzës, këto të dhëna lidhen me aspekte politike dhe të sigurisë brenda territorit të Kosovës.

Vlajiç u shpreh se i kupton pasojat e pranimit të fajësisë.