Elias Krasniqi
Deputetët e PDK-së dhe Aleancës janë mbledhur sërish në sallën e Kuvendit, duke kërkuar vazhdimin e seancës konstituive.
Deputetja e PDK-së, Ariana Musliu-Shoshi, e ka akuzuar kryeministrin në detyrë, Albin Kurtin, për shkelje të Kushtetutës.
“Gjykata ka folur, Kushtetuta ka folur, por deputeti Kurti ka zgjedhur të mos i dëgjojë asnjërën”, ka deklaruar Musliu-Shoshi.
Ndërsa Ramush Haradinaj ka thënë se Kurti po i shtyn qëllimshëm proceset për formimin e institucioneve dhe ka propozuar Hashim Thaçin për president.
Haradinaj e ka quajtur “nder” të legjislaturës vazhdimin e mandatit të Thaçit.
PDK dhe AAK po kërkojnë nga kryesuesi i seancës, Avni Dehari, që ta thërrasë vazhdimin e saj. Deputetët e këtyre partive janë mbledhur në Kuvend çdo 48 orë që nga fillimi i gushtit, kur Kurti kërkoi shtyrjen e seancës për shkak të mungesës së marrëveshjes për presidentin.
Seanca konstituive e legjislaturës së re është ftuar dy herë. Deputetët e kanë dhënë betimin, por procesi ka mbetur te zgjedhja e kryetarit të Kuvendit.
Kurti ka nisur ndërkohë negociatat me LDK-në për çështjen e presidentit, ndërsa kriza politike në vend vazhdon prej zgjedhjeve të shkurtit 2025.
