Elias Krasniqi
Gjykata e Apelit ka aprovuar ankesën e Prokurorisë Speciale dhe ka caktuar masën e paraburgimit për tre shtetas të Shqipërisë, të cilëve iu gjetën rreth 1 milion euro të fshehura në një hapësirë të improvizuar brenda një furgoni, në pikën kufitare në Merdarë, më 24 shkurt 2026.
Tre të dyshuarit akuzohen për veprën penale “shpëlarje e parave” dhe fshehje të burimit të pasurisë së përfituar nga aktiviteti kriminal. Vendimi i Apelit ndryshoi vendimin e mëparshëm të Gjykatës Themelore, e cila kishte refuzuar kërkesën për paraburgim. Apeli vlerësoi se ekziston rreziku i arratisjes dhe i pengimit të procedurës penale.
Sipas Prokurorisë, të dyshuarit tentuan t’i transferojnë paratë duke i fshehur dhe maskuar ato, ndërsa kishin mohuar posedimin e tyre gjatë kontrollit doganor. Në furgon u gjetën 18 pako me kartëmonedha të vlerave të ndryshme.
Të dyshuarit do të qëndrojnë në paraburgim deri në përfundim të hetimeve, ndërsa kanë të drejtë ankese në Gjykatën Supreme.
