Elias Krasniqi
Kosovarët kanë shpenzuar plot 158 milionë euro për importin e cigareve vetëm brenda vitit 2025, sipas publikimit te institutit GAP, i cili i referohet statistikave të Doganes së Kosovës.
Ky nivel i lartë i konsumit e rendit duhanin si produktin e katërt më të importuar në vend, duke u radhitur menjëherë pas kategorive si veturat, derivatet dhe energjia elektrike.
Ish-drejtori i Institutit Kombëtar të Shëndetësisë Publike, Naser Ramadani, pati deklaruar më 2023 se duhani përbën një kërcënim serioz për shëndetin në Kosovë, duke bërë thirrje të vazhdueshme për uljen e nivelit të konsumit.
Ndërkohë, sipas Organizatës Botërore të Shëndetësisë (OBSH), duhani vret deri në gjysmën e përdoruesve të tij.
Mbi 8 milionë njerëz vdesin çdo vit globalisht si sebep i duhanpirjes. Nga kjo shifër, rreth 1.3 milionë vdekje u shkaktohen jo-duhanpirësve që ekspozohen ndaj tymit, duhanpirësit pasivë.
Përkundër rreziqeve të dokumentuara, Kosova vazhdon të dështojë në zbatimin e Ligjit për Kontrollin e Duhanit, i cili mes tjerash ndalon rreptësisht pirjen e cigareve në ambiente të mbyllura.
