Granit Tahiri
Ish-kryetari i Malishevës, Isni Kilaj, është liruar me kusht nga Gjykata Speciale, pasi u konstatua se mbajtja e tij në paraburgim nuk është më e arsyeshme dhe as proporcionale. Kilaj akuzohet bashkë me Hashim Thaçin, Bashkim Smakajn, Fadil Fazliun dhe Hajredin Kuçin për pengim të drejtësisë në kuadër të “Çështjes 12”.
Në vendimin e 3 dhjetorit 2025, Gjykata konstatoi se rrethanat kanë ndryshuar që nga apeli i fundit në tetor. Edhe pse ekziston njëfarë rreziku që Kilaj të ndikojë në proces ose të kryejë vepra të tjera, Gjykata vlerësoi se e drejta e tij për liri peshon më shumë në rrethanat aktuale.
Një nga arsyet kryesore për lirimin me kusht është se koha që Kilaj ka kaluar në paraburgim tejkalon tashmë dënimin minimal që do të përballej nëse shpallej fajtor. Gjykata mori në konsideratë edhe përfundimin e paraqitjes së provave në çështjen kryesore kundër Thaçit dhe të tjerëve.
Sipas vendimit, rreziku që Kilaj të ndikojë në dëshmitarët e Prokurorisë është shumë i ulët, ndërsa rreziku i arratisjes nuk ekziston, bazuar në sjelljen e tij gjatë lirimit të mëparshëm dhe ofrimin e një garancie financiare të konsiderueshme.
Gjykata paralajmëroi se çdo shkelje e kushteve të vendosura për lirimin me kusht do të çojë në arrestimin e tij.
