Granit Tahiri
Presidenti amerikan Donald Trump iu drejtua të hënën parlamentit izraelit.
Fjalimi i tij u ndërpre për pak çaste, kur deputeti i opozitës Ayman Odeh ngriti një letër me mbishkrimin “Njihni Palestinën”. Ai u nxor jashtë nga sigurimi, sikurse edhe deputeti tjetër Ofer Cassif, që u përjashtua për të njëjtën arsye, raportojnë mediat ndërkombëtare.
Pas incidentit, Trump e vazhdoi adresimin para ligjvënësve izraelitë, i cili vjen pak para udhëtimit për në Egjipt, ku pritet të bashkëkryesojë një samit ndërkombëtar mbi marrëveshjen e paqes ne Gaza.
Deputeti i perjashtuar Odeh reagoi në llogarinë e tij në X.
“Sasia e hipokrizisë në parlament është e padurueshme. Të kurorëzosh Netanyahun me lajka të tilla që nuk janë parë kurrë, përmes një grupi të orkestruar, nuk e liron atë dhe qeverinë e tij nga krimet kundër njerëzimit të kryera në Gaza, as nga përgjegjësia për gjakun e qindra mijëra viktimave palestineze dhe mijëra viktimave izraelite,” tha ai në X.
