Granit Tahiri
Gjermania ka zhvilluar një plan të detajuar sekret ushtarak, të koduar OPLAN DEU, për t’u përgatitur ndaj një konflikti të mundshëm me Rusinë. Dokumenti prej 1.200 faqesh parashikon mobilizimin e deri në 800 mijë trupave gjermane, amerikane dhe të NATO-s në frontin lindor.
Sipas mediave gjermane, plani nisi të hartohej rreth dy vjet e gjysmë më parë në bazën Julius Leber në Berlin, ku 12 oficerë të lartë punuan konfidencialisht duke simuluar një skenar lufte. Sot, ai po testohet përmes ushtrimeve të mëdha ushtarake në të gjithë vendin.
Dokumenti përshkruan korridoret logjistike për transportin e trupave dhe pajisjeve – nga portet, te hekurudhat, lumenjtë dhe autostradat. Ekspertët theksojnë se për shkak të pozitës strategjike, çdo përforcim i NATO-s drejt lindjes duhet të kalojë përmes Gjermanisë, duke e bërë atë boshtin e operacioneve të aleancës.
Plani përfshin një qasje të re “të gjithë shoqërisë”, që bashkon sektorin civil dhe atë ushtarak, e bazuar në doktrinat e Luftës së Ftohtë, por e përditësuar me sfidat moderne – nga infrastruktura e plakur te kapacitetet e reduktuara ushtarake.
Zyrtarët gjermanë parashikojnë se Rusia mund të ketë kapacitete të plota për të goditur një vend të NATO-s rreth vitit 2029, megjithëse veprimet e fundit të Kremlinit – spiunazh, sabotime dhe shkelje të hapësirës ajrore – sugjerojnë se rreziku mund të shfaqet më herët. Sipas analistëve, edhe një armëpushim i përkohshëm në Ukrainë do t’i hapte rrugë Moskës të zhvendosë fokusin drejt Evropës Lindore.
Në ushtrimet e fundit në Gjermaninë lindore, kompania Rheinmetall ngriti brenda 14 ditësh një kamp të përkohshëm për 500 trupa. Stërvitjet zbuluan pengesa në terren, mungesë sinjalistikash përgjatë korridoreve ushtarake dhe sfida të shumta në lëvizjen e mjeteve të rënda.
Infrastruktura gjermane, dikur shtylla e operacioneve të Luftës së Ftohtë, sot është e amortizuar:
• 20% e autostradave kërkojnë riparim
• ¼ e urave nuk përballojnë më ngarkesat ushtarake
• Portet e Detit të Veriut dhe Baltikut kërkojnë rreth 15 miliardë euro investime
Incidentet e fundit, si përplasja e anijes holandeze Rapida me një urë në lumin Hunte që bllokoi transportin e municioneve për Ukrainën, tregojnë se zinxhiri i furnizimit është mjaft i brishtë.
Ligjet strikte për mbrojtjen e të dhënave, rregulloret e vjetra dhe kufizimet për dronët mbi zona urbane vazhdojnë të ngadalësojnë reagimin ushtarak. NATO paralajmëron rritje të rrezikut nga sabotimet, ndërhyrjet elektronike dhe sulmet kibernetike.
Në Hamburg, gjatë ushtrimit “Red Storm Bravo”, një konvoj me 65 mjete dhe 500 ushtarë u përball me protesta të simuluara dhe sulme me dronë, duke shkaktuar vonesa të paparashikuara – një reflektim i realitetit të ri operacional.
Kancelari gjerman Friedrich Merz paralajmëroi se Evropa po hyn në një epokë të re pasigurie:
“Kërcënimet janë reale. Nuk jemi në luftë, por nuk jetojmë më në paqe”.
Megjithëse sekret, OPLAN DEU tregon se Gjermania po transformohet në një shtet të përgatitur për skenarë lufte, duke kombinuar logjistikën, infrastrukturën civile, ushtrinë dhe koordinimin me NATO-n. Qëllimi, sipas zyrtarëve, është i qartë:
“Duam t’i tregojmë kundërshtarit se një sulm nuk do të ketë sukses”.
