Ronaldo e pranon: Botërori i ardhshëm do të jetë i fundit për mua

Cristiano Ronaldo ka pranuar se fundi i karrierës së tij po afrohet. Sulmuesi i Al-Nassr tha se Kupa e Botës 2026 do të jetë turneu i tij i fundit me Portugalinë, duke sinjalizuar mbylljen e një epoke të artë në historinë e futbollit botëror.

“Do të dal në pension së shpejti… Kam dhënë gjithçka në futboll në këto 25 vjet. Ndoshta më kanë mbetur vetëm një ose dy sezone. Pa dyshim, kjo Kupë Bote që po vjen do të jetë e fundit për mua. Po e shijoj vërtet çdo moment të kësaj faze,” ka thënë Ronaldo, sipas burimeve të afërta që citojnë gazetarin Fabrizio Romano.

Ronaldo, tashmë 40 vjeç, mbetet në formë të lartë edhe në fund të karrierës. Që nga janari i vitit 2023, ai luan për Al-Nassr në Arabinë Saudite, pas largimit nga Manchester United.

Në këtë sezon, kapiteni portugez ka zhvilluar 11 ndeshje në të gjitha garat, duke shënuar 10 gola dhe dhënë 2 asiste, shifra që dëshmojnë se instinkti i tij për gol mbetet i pandryshuar.