Messi tregon nëse do të luajë në Botërorin 2026?

Lionel Messi, kapiteni i Argjentinës dhe ylli i Inter Miami, ka folur me sinqeritet për dilemat që lidhen me pjesëmarrjen e tij në Kampionat Botëror 2026. Në një intervistë për Diario Sport, 8-herë fituesi i Topit të Artë nuk fshehu emocionet, por as përgjegjësinë që ndien ndaj fanellës së tij legjendare.

“Jam shumë i emocionuar për Kupën e Botës. Por nuk dua të jem barrë, duhet të ndihem mirë fizikisht, të jem i sigurt se mund të ndihmoj vërtet dhe të jap një kontribut të vërtetë për ekipin. Do të kontrolloj çdo ditë për të parë nëse ndihem fizikisht i aftë për të garuar ashtu siç dua”, tha Messi.

Messi do të jetë 39 vjeç në verën e vitit 2026. Për shumë tifozë, prania e tij në turne do të ishte fundi ideal i një epopeje të artë, e cila kulmoi me triumfin në Katar 2022.

Turneu i ardhshëm do të zhvillohet nga 11 qershori deri më 19 korrik 2026, në një format të ri me 48 skuadra dhe tri vende organizatore: SHBA, Meksikë dhe Kanada. Dhe pavarësisht nëse Messi do të jetë aty apo jo, bota e futbollit e di një gjë: asnjë Botëror nuk është i njëjtë pa të.