Aziz Bejtullahu
Federata Shqiptare e Futbollit (FSHF) është gjobitur nga FIFA me 161,500 franga zvicerane (rreth 200,000 dollarë) për shkeljet e konstatuara gjatë ndeshjes Shqipëri–Serbi më 7 qershor në Tiranë.
Sipas vendimit të organit më të lartë të futbollit, dënimi u mor për ndërprerjen e himnit kombëtar serb dhe shfaqjen e mesazheve të papërshtatshme gjatë një ngjarjeje sportive.
Ndeshja, e cila përfundoi në barazim 0-0, kishte peshë të veçantë për shkak të tensioneve historike mes dy vendeve, të cilat kanë gjetur reflektim edhe në fushat e futbollit. Incidenti më i njohur mes dy kombeve mbetet ai i dronit në Beograd në vitin 2014, i cili ndërpreu një ndeshje kualifikuese për Euro 2016.
Përveç gjobës financiare, FIFA ka vendosur gjithashtu një masë disiplinore që parashikon uljen me 20% të kapacitetit të stadiumit në një ndeshje të ardhshme.
Shqipëria do të zhvillojë takimin tjetër në grup ndaj Letonisë të martën e ardhshme, në një grup ku kryeson Anglia. Ndeshja e kthimit ndaj Serbisë do të luhet më 11 tetor në Beograd.
