Elias Krasniqi
Shefi i ushtrisë izraelite, Eyal Zamir, ka autorizuar rikthimin në shërbim rezervë të pesë ushtarëve të akuzuar për abuzim seksual ndaj një të burgosuri palestinez në kampin e ndalimit Sde Teiman, pasi akuzat ndaj tyre u hodhën poshtë.
Sipas mediave izraelite, disa prej tyre tashmë janë rikthyer edhe në role luftarake, ndonëse ndaj tyre vazhdon një hetim i brendshëm ushtarak.
Rasti kishte shkaktuar reagime të forta, pasi pamjet e transmetuara në televizionet izraelite tregonin abuzimin e rëndë ndaj të burgosurit.
Sipas aktakuzës fillestare, viktima kishte pësuar lëndime serioze, përfshirë brinjë të thyera dhe dëmtime të brendshme.
Prokurori ushtarak, Itay Offir, i hodhi poshtë akuzat duke përmendur mungesë provash dhe vështirësi procedurale, pasi i ndaluari ishte kthyer në Gaza.
Vendimi është kritikuar ashpër nga organizatat për të drejtat e njeriut. Amnesty International e cilësoi si një tjetër rast të mosndëshkimit për krimet ndaj palestinezëve, duke theksuar se rastet e abuzimit në qendrat izraelite të ndalimit janë të përhapura.
Edhe ish-të burgosur palestinezë kanë raportuar për dhunë sistematike, përfshirë rrahje, uri dhe abuzim seksual gjatë qëndrimit në paraburgim.
