Elias Krasniqi
Paris Saint-Germain ka marrë një tjetër arsye për shqetësim para finales së UEFA Champions League kundër Arsenal-it më 30 maj, pasi Ousmane Dembélé u detyrua të largohej herët nga fusha në ndeshjen e fundit të Ligue 1.
Sulmuesi dyshohet se ka pësuar një tërheqje muskulore gjatë humbjes 2-1 në derbin e fundit. Trajneri Luis Enrique dha mendimin e tij pas ndeshjes, duke sugjeruar se zëvendësimi mund të ketë qenë thjesht një masë parandaluese.
“Unë mendoj se është vetëm lodhje. Çka po themi sot është spekulim, por nuk besoj se është diçka serioze dhe kemi ende dy javë kohë,” tha Enrique.
Shqetësimet për lëndimin nuk lidhen vetëm me klubin, por edhe me përfaqësuesen e Francës, pasi Dembélé është pjesë e planeve të kombëtares franceze për Kupën e Botës FIFA 2026. Një problem muskulor i vazhdueshëm mund të ndikojë edhe në stërvitjet e tij me ekipin.
Lojtari do t’i nënshtrohet sot testeve mjekësore, pas të cilave klubi pritet të dalë me një njoftim zyrtar.
