Elias Krasniqi
Ministria e Mbrojtjes synon që gjatë këtij viti të nisë zbatimin e programit për shërbim ushtarak vullnetar, duke hequr dorë nga ideja e mëhershme për shërbim të detyrueshëm, për shkak të kostos së lartë financiare dhe sfidave organizative.
Ministri i Mbrojtjes, Ejup Maqedonci, ka bërë të ditur se projekti është pjesë e Programit Kombëtar për Mbrojtje Gjithëpërfshirëse, i miratuar nga Qeveria në vitin 2024.
“Formati është i ndryshëm, por qëllimi mbetet i njëjtë – mbrojtja e territorit dhe e qytetarëve. Shërbimi vullnetar është më i përballueshëm financiarisht dhe më i përshtatshëm në aspektin ligjor”, ka theksuar Maqedonci.
Sipas tij, çdo qytetar do të mund të regjistrohet vullnetarisht dhe të bëhet pjesë e strukturave të Ushtrisë së Kosovës, paralelisht me angazhimet e tij profesionale.
Megjithatë, ish-komandanti i përgjithshëm i Forca e Sigurisë së Kosovës, gjenerali Kadri Kastrati, ka vlerësuar se Kosova aktualisht nuk ka infrastrukturën e nevojshme as për modelin e detyrueshëm e as për atë vullnetar.
Ai ka theksuar mungesën e kapaciteteve trajnuese dhe organizative, duke propozuar një model më fleksibil, të ngjashëm me atë që aplikohet në Shtetet e Bashkuara të Amerikës, ku të rinjtë trajnohen periodikisht gjatë vikendeve dhe shërbejnë si rezervë potenciale.
Programi Kombëtar për Mbrojtje gjithëpërfshirëse është miratuar më 11 shtator 2024, ndërsa shërbimi i detyrueshëm ushtarak nuk është përfshirë në të, pavarësisht se kishte qenë një prej zotimeve të mëhershme të kryeministrit Albin Kurti.
