Aziz Bejtullahu
Ylli brazilian Neymar mund të largohet nga Al-Hilal si lojtar i lirë, pasi raportet e fundit sugjerojnë se nuk do të realizohet një huazim, siç ishte menduar më parë. Sipas informacionit të publikuar nga Globo, negociatat mes palëve po vazhdojnë, por ende nuk ka një marrëveshje përfundimtare, veçanërisht përsa i përket detyrimeve financiare të lojtarit.
Në kontratën e Neymar me Al-Hilal, mbeten ende 65 milionë dollarë borxh, një shumë që braziliani nuk ka ndërmend ta falë, megjithëse është i gatshëm të lirohet nga klubi sa më shpejt të jetë e mundur. Aktualisht, është e mundur që pagesat të shtrihen në disa muaj të tjerë për t’u zgjidhur ky detyrim.
Santos, klubi i tij i mëparshëm, është optimist për mundësinë e rikthimit të Neymar dhe po e monitoron nga afër situatën. Tashmë, klubi brazilian ka arritur marrëveshjen me lojtarin për t’i mundësuar një transferim të mundshëm, pas një periudhe të shkurtër dhe me shumë dëmtime në Al-Hilal.
Kjo javë pritet të jetë vendimtare për zgjidhjen e këtij episodi dhe për të parë nëse Neymar do të vazhdojë aventurën në Arabinë Saudite apo do të rikthehet në Brazil.
