Aziz Bejtullahu
Arsenali ka finalizuar një nga goditjet më të bujshme të merkatos së verës, duke siguruar shërbimet e sulmuesit suedez Viktor Gyokeres nga klubi portugez Sporting CP.
Sulmuesi 27-vjeçar kaloi me sukses testet mjekësore më 26 korrik dhe menjëherë më pas nënshkroi kontratën e re me klubin londinez, siç raporton eksperti i njohur i transferimeve Fabrizio Romano. Gyokeres do të mbajë fanellën me numrin 14 te Arsenali, ndërsa marrëveshja kap vlerën e 63.5 milionë eurove, me një shtesë prej 10 milionë eurosh në formë bonusesh.
Ky transferim përfaqëson një investim serioz për Arsenalin, që synon të përforcojë repartin ofensiv për sezonin e ri, duke pasur parasysh paraqitjet mbresëlënëse të Gyokeres gjatë sezonit të kaluar në kampionatin portugez. Suedezi ishte një nga lojtarët më produktivë në Evropë, me 39 gola dhe 7 asistime në 33 ndeshje të zhvilluara.
Performanca e tij ka rritur ndjeshëm profilin dhe vlerën në treg, ndërsa pritet që ai të luajë një rol kyç në objektivat e Arsenalit në Premier League dhe Ligën e Kampionëve për sezonin 2025/26.
