Aziz Bejtullahu
Manchester City ka identifikuar portierin e Portos, Diogo Costa, si prioritet kryesor për përforcimin e pozicionit të portierit, në rast të largimit të Ederson Moraes gjatë kësaj vere.
Me një vlerë transferimi prej 75 milionë eurosh, Costa ka tërhequr vëmendjen e trajnerit Pep Guardiola dhe drejtuesve të klubit, të cilët kanë nisur kontaktet paraprake për të shqyrtuar mundësinë e transferimit të portierit portugez.
Situata e largimit të mundshëm të Edersonit nga Etihad po bëhet gjithnjë e më reale, sidomos pas interesit të fortë të Galatasarayt, kampionit të ligës turke, që kërkon të forcojë këtë pozicion me një portier të nivelit të lartë.
Menaxhmenti i Manchester Cityt po përgatitet për një ndryshim në këtë repart dhe konsideron Diogo Costan si një zëvendësues të besueshëm, falë performancave të tij të spikatura si në Porto, ashtu edhe me përfaqësuesen e Portugalisë. Ky transferim mund të jetë një hap i rëndësishëm për të siguruar stabilitet në portën e kampionëve anglezë për sezonet e ardhshme.
