Elias Krasniqi
Konflikti mes Izraelit dhe Iranit ka hyrë në ditën e 16-të, ndërsa gjatë natës palët kanë vazhduar shkëmbimin e sulmeve, raporton BBC.
Fotot nga qyteti Holon tregojnë dëme në një zonë banimi, përfshirë një veturë të përmbysur dhe një vrimë në murin e një ndërtese. Sipas shërbimeve emergjente, dy persona kanë pësuar lëndime të lehta. Sulme të tjera të raportuara gjatë orëve të fundit kanë shkaktuar zjarr në një veturë dhe kanë plagosur dy burra rreth të 50-ave.
Ndërkohë, Forcat Mbrojtëse të Izraelit (IDF) kanë njoftuar se kanë kryer sulme të reja në pjesën perëndimore të Iranit. Në Liban, ushtria izraelite ka lëshuar urdhra të rinj evakuimi për banorët në periferinë jugore të Bejrutit.
Shtetet e Gjirit kanë raportuar gjithashtu interceptime të dronëve dhe raketave gjatë natës. Arabia Saudite ka bërë të ditur se ka rrëzuar 26 dronë iranianë, ndërsa Kuvajti ka njoftuar se ka rrëzuar pesë të tjerë gjatë 24 orëve të fundit. Sirena alarmi janë dëgjuar edhe në Bahrejn.
Në një intervistë për NBC News, presidenti i SHBA-së, Donald Trump, ka deklaruar se Irani dëshiron një marrëveshje, por sipas tij kushtet aktuale “nuk janë mjaftueshëm të mira”. Ai gjithashtu tha se SHBA-ja ka “shkatërruar plotësisht” qendrën kryesore të naftës së Iranit në ishullin Kharg.
Ndërkohë, sekretari britanik i energjisë, Ed Miliband, ka deklaruar se “të gjitha opsionet janë duke u shqyrtuar” për rihapjen e Ngushticës së Hormuzit, pasi Trump u ka bërë thirrje disa shteteve, përfshirë Mbretërinë e Bashkuar, që të dërgojnë anije luftarake në rajon.
