Elias Krasniqi
Tottenham Hotspur u mposht me rezultat 5-2 nga Atletico Madridi në ndeshjen e parë të fazës së 1/8-ave të finales në Ligën e Kampionëve. Kjo ndeshje do të mbahet mend për arsye negative nga portieri çek i Tottenhamit, Antonin Kinsky, për shkak të debutimit të tij katastrofal në këtë kompeticion.
22-vjeçari bëri disa gabime të rënda që çuan në golat e shënuar nga Marcos Llorente në minutën e 6-të dhe Julian Alvarez në minutën e 15-të. Sipas Squawka, Kinsky pësoi tre gola brenda vetëm 15 minutave, duke hyrë në librat e historisë si portieri që ka pranuar tre gola në kohën më të shpejtë në historinë e fazës me eliminim direkt të Ligës së Kampionëve.
Deri në minutën e 17-të, trajneri Igor Tudor pa mjaftueshëm dhe e zëvendësoi Kinskyn me Guglielmo Vicarion. Ky vendim shënoi edhe një moment tjetër negativ për çekun, pasi ishte hera e parë në historinë e këtij turneu që një portier zëvendësohet pa qenë i lënduar.
Kujtojmë se Kinsky iu bashkua Tottenhamit nga Slavia e Pragës në fillim të vitit 2025 për 16.5 milionë euro. Ai ka bërë tri paraqitje këtë sezon dhe ka një kontratë me klubin të vlefshme deri në vitin 2029.
