Granit Tahiri
Ai që hyn në Kosovë e nuk është shtetas i saj apo vozit veturë të huaj këtu duhet me i ditë këto detyrime ligjore, sipas njoftimit të Ministrisë së Punëve të Brendshme.
Për fillim, kush nuk është kosovar e don me nejt në Kosovë ma gjatë se 90 ditë brenda 180 ditëve duhet me u pajis me një lejeqëndrim. Cilido i huaj që hyn duhet të lajmërojë adresën e qëndrimit në afat prej tri (3) ditësh nga dita e hyrjes, në kufi apo në stacionin më të afërt policor.
Po ashtu, të ketë mjete të mjaftueshme për jetesë. Sa duhet të jetë shuma sipas Ligjit Nr. 04/L-219 për të Huajt nuk caktohet, veçse aty thuhet kështu:
Neni 31 – Kushtet për hyrjen e të huajit në Republikën e Kosovës
Pika 3. Shuma e mjeteve të mjaftueshme për jetesë përcaktohet me vendim të veçantë të ministrit të MPB-së dhe lartësia e kësaj shume vlerësohet në përputhje me kohëzgjatjen dhe qëllimin e qëndrimit, duke u bazuar në çmimet mesatare për jetesë.
Nëse ai vjen me veturën e tij duhet me pas parasysh se ka të drejtë që të qarkullojë me të jo më tepër se tre muaj prej datës së hyrjes.
Nuk ka të drejtë shtetasi i Kosovës të qarkullojë me veturën me targa të huaja nëse i pranishëm në veturë nuk është pronari i veturës, përveçse nëse i njëjti posedon lejeqëndrim të përhershëm a të përkohshëm të vendit prej nga është sjellë vetura dhe ka autorizim nga shteti përkatës.
Nëse dikush që është shtetas i Kosovës posedon automjet me targa të huaja, mundet me vozit 3 muaj nga data e hyrjes në Kosovë nëse posedon leje qëndrimi të përkohshme ose të përhershme në shtetin prej nga ka ardhë vetura. E nëse nuk e ka asnjërën, mundet me i grah në Kosovë veç tetë ditë.
Kosovarët që janë kthy nga shtetet e huaja mund të drejtojnë automjetin me patentë shofer të huaj të vlefshme deri në një (1) vit nga dita e hyrjes në Kosovë.
E njëjta rregull vlen edhe për të huajt që kanë lejeqëndrim të përkohshëm a të përhershëm.
Zbatimi i plotë fillon më 15 mars 2026 dhe mosrespektimi pason me ndëshkim sipas ligjeve në fuqi.
