Përmbytjet në Marok: Të paktën 37 të vdekur në Safi

Maroku, i goditur shpesh nga thatësira, u përball të dielën me përmbytjet më vdekjeprurëse në të paktën një dekadë në qytetin bregdetar Safi.

Të paktën 37 persona kanë humbur jetën në përmbytjet e shkaktuara nga shirat e rrëmbyeshëm në provincën bregdetare Safi të Marokut në Atlantik, sipas autoriteteve.

Transmetuesi shtetëror SNRT News citoi të hënën autoritetet lokale të kenë thënë se të paktën 14 persona kishin marrë trajtim spitalor, përfshirë dy në njësinë e kujdesit intensiv, pas shiut të papritur të rrëmbyeshëm të dielën.

Një rrjedhë e madhe balte rrëmbeu makina dhe grumbuj mbeturinash në rrugët e qytetit, rreth 300 kilometra në jug të kryeqytetit Rabat.

Parashikuesi kombëtar i motit, Drejtoria e Përgjithshme e Meteorologjisë (DGM), paralajmëroi se gjatë tre ditëve të ardhshme priten edhe stuhi të tjera në disa zona, përfshirë Safi.

Katërmbëdhjetë persona që shpëtuan trajtohen në spitalin Mohammed V, dy prej të cilëve në kujdes intensiv, sipas autoriteteve lokale.

Shkollat janë mbyllur për të paktën tre ditë, ndërsa rrugët janë bllokuar nga balta dhe mbeturinat.

“U përmbytëm nga uji. Nuk mundëm të flinim gjithë natën. Humbëm gjithçka, madje edhe librat e fëmijëve të mi,” tha për AFP Hanane Nasreddine, nënë e gjashtë fëmijëve, me zërin që dridhej.

Nezha El Meghouari tregoi se kishte pasur vetëm disa momente për të shpëtuar nga shtëpia e saj.

“Kam humbur të gjitha rrobat. Vetëm fqinja më dha disa për t’u mbuluar. Nuk më ka mbetur asgjë. Kam humbur gjithçka,” tha ajo.

Të paktën 70 shtëpi dhe biznese në qendrën historike të qytetit u përmbytën, ndërsa tregtari 55-vjeçar Abdelkader Mezraoui tha se ekonomia e tregtisë është shkatërruar.