Aziz Bejtullahu
Sonte, gjithë Europa e futbollit mban frymën përballë dueleve të mëdha. Në orën 18:45, Atalanta pret Club Brugge në Bergamo, ndërsa në të njëjtën kohë Real Madrid zbret në Kazakistan për t’u përballur me Kairat Almaty, në një transfertë të pazakontë ku “Los Blancos” kërkojnë fitoren e dytë radhazi.
Ora 21:00 sjell përplasjet e mëdha. Atlético Madrid sfidon Eintracht Frankfurt në “Cívitas Metropolitano”, një duel që pritet të testojë forcën e spanjollëve ndaj kampionëve gjermanë. Në Norvegji, Bodø/Glimt pret Tottenhamin, një ndeshje ku skuadra e Premier League rrezikon në një terren të ftohtë e të vështirë.
Në Londër, vëmendja përqendrohet te Chelsea – Benfica. Përballja shënon rikthimin emocional të José Mourinhos në “Stamford Bridge”, kësaj here në pankinën e portugezëve. Një duel i ngarkuar me histori e emocione.
Një tjetër kryendeshje zhvillohet në Stamboll: Galatasaray – Liverpool. Atmosfera turke premton zjarr, ndërsa “Reds” kërkojnë të konsolidojnë pozitën e tyre në grup, por në një fushë ku shumë skuadra të mëdha kanë rrëshqitur.
Në Milano, Interi matet me Slavia Praha, ndërsa Marseille në “Vélodrome” përballet me Ajax-in, një përballje mes dy emrave me histori të madhe në Europë.
Spektakli mbyllet në Qipro, ku surpriza Pafos pret gjigantin Bayern München. Bavarezët nuk njohin kompromis dhe synojnë të tregojnë forcën e tyre edhe larg “Allianz Arenës”.
