Aziz Bejtullahu
Në moshën 18-vjeçare, Franco Mastantuono nisi të shkruajë kapitullin e tij të parë në librin e madh të Real Madridit. Një gol ndaj Levantes, një shpërthim në “Santiago Bernabéu” dhe një mesazh i qartë për botën: ai nuk dëshiron të jetë kopje e askujt.
“E përgëzoj Yamal për vendin e dytë në Topin e Artë, është një lojtar i jashtëzakonshëm. Por unë nuk krahasohem. Unë luaj për ekipin dhe jam i bindur se kjo qasje sjell edhe arritjet personale”, tha argjentinasi për Foot Mercato, duke treguar pjekuri që shkon përtej moshës së tij.
Franco nuk kërkon të ndjekë hije, as të ecë në gjurmët e të tjerëve. Ai mbështetet në ADN-në e tij: stil, karakter dhe identitet.
“Gjithmonë mbetem autentik, përpiqem të diktoj lojën time dhe të tregoj personalitetin tim. Ndoshta kjo është arsyeja pse Real Madridi më solli këtu.”
I ardhur nga River Plate këtë verë, nënshkrimi i ri i Florentino Pérez nuk ka humbur asnjë ndeshje të bardhëve këtë sezon. Dhe tani, me golin e parë në fanellën e Realit, Mastantuono jo vetëm që konfirmon pritjet, por ndiz edhe ëndrrën e tifozëve: një tjetër yll i lindur në tapetin e shenjtë të Bernabéut.
