Aziz Bejtullahu
Trajneri i ri i Kombëtares së Polonisë, Jan Urban, ka vënë në qendër të planeve të tij bindjen e Robert Lewandowskit për t’u ribashkuar me ekipin kombëtar. Në paraqitjen e tij të parë publike si përzgjedhës, Urban deklaroi se kthimi i sulmuesit legjendar është “përparësia kryesore” në këtë fazë vendimtare për Poloninë.
Urban u emërua të mërkurën si pasardhës i Michał Probierz, i cili dha dorëheqjen në qershor pas një përplasjeje të ashpër me Lewandowskin, për shkak të vendimit për t’i hequr atij shiritin e kapitenit. Ky tension çoi në një atmosferë të përçarë brenda skuadrës dhe pasiguri për të ardhmen e liderit të saj historik.
“Do të bëj gjithçka që mundem për ta rikthyer Robertin, sepse e kuptojmë situatën në të cilën ndodhet futbolli polak. Siç qëndron situata sot, thjesht nuk mund ta përballojmë dot pa Robert Lewandowskin në këtë ekip“, tha Urban para gazetarëve.
Në moshën 36-vjeçare, sulmuesi i Barcelonës është golashënuesi më i mirë në histori të Polonisë me 85 gola në 158 ndeshje dhe shihet si kyç për shpresat e kualifikimit në Kupën e Botës 2026. Aktualisht, Polonia ndodhet në vendin e tretë në grupin kualifikues, pas Holandës dhe Finlandës, dhe ka nevojë për një kthesë të shpejtë në formë.
Urban pranoi se sfidat janë të mëdha, veçanërisht pas humbjes 2-1 ndaj Finlandës muajin e kaluar dhe krizës së besimit brenda skuadrës:
“Para së gjithash, po përballemi me një moment të vështirë jo vetëm për shkak të humbjes ndaj Finlandës. Kemi disa çështje për të adresuar, veçanërisht çështjen e tërheqjes së mundshme të Robertit nga futbolli ndërkombëtar.”
Ai shtoi se qëllimi është të krijohet një mjedis i shëndetshëm ku çdo lojtar të ndihet pjesë e rëndësishme e skuadrës kombëtare.
Polonia do të përballet me Holandën më 4 shtator në një sfidë jashtë fushe, përpara se të presë Finlandën tri ditë më vonë në një duel vendimtar për fatin e kualifikimit.
