Aziz Bejtullahu
Rasmus Højlund mund të rikthehet sërish në Serie A, kësaj here me fanellën e Romës. Sipas raportimeve të Gianluca Di Marzio dhe gazetës daneze Tipsbladet, klubi nga kryeqyteti italian është duke shqyrtuar mundësinë e huazimit të sulmuesit 22-vjeçar që aktualisht luan për Manchester United.
Vlera e kartonit të Højlund në treg është rreth 45 milionë euro, shifër që konsiderohet e papërballueshme për Giallorossët në këtë merkato. Për këtë arsye, një marrëveshje huazimi shihet si alternativa më e realizueshme në këtë fazë.
Trajneri i ri i Romës, Gian Piero Gasperini, ka njohuri të afërta për aftësitë e Højlund, pasi ka punuar me të te Atalanta. Nën drejtimin e Gasperinit, danezi pati shpërthimin e tij si një nga talentët më premtues në futbollin italian. Tani, trajneri dëshiron ta ketë sërish nën urdhrat e tij për të forcuar repartin sulmues të ekipit.
Roma pritet të bëjë së shpejti një ofertë zyrtare për huazimin e lojtarit, megjithëse negociatat me Manchester United nuk pritet të jenë të lehta, për shkak të statusit që Højlund ka në ekipin anglez.
Nëse marrëveshja finalizohet, rikthimi i Højlund në Serie A do të ishte një nga transferimet më të bujshme të verës në kampionatin italian.
