Aziz Bejtullahu
Florian Wirtz është shumë pranë të bëhet përforcimi më i madh i verës për Liverpoolin. Mesfushori gjerman i Bayer Leverkusen ka mbërritur sot në Mbretërinë e Bashkuar (19 qershor), ku do t’i nënshtrohet fazës së parë të ekzaminimeve mjekësore përpara zyrtarizimit të transferimit në “Anfield”.
Sipas gazetarit të Sky Sports, Florian Plettenberg, 22-vjeçari do të kompletojë setin e plotë të kontrolleve mjekësore të premten, duke i hapur rrugë nënshkrimit me “The Reds”.
Vlera totale e marrëveshjes pritet të arrijë në plot 150 milionë euro, përfshirë bonuset, një shumë rekord për klubin anglez. Wirtz do të nënshkruajë një kontratë pesëvjeçare me Liverpoolin, me një pagë bruto prej 20 milionë eurosh në vit, plus bonuse shtesë.
Ylli i Leverkusenit ka qenë një nga lojtarët më të spikatur në Evropë këtë sezon, dhe konsiderohet si një nga mesfushorët më kreativë të brezit të tij. Transferimi i tij shihet si pjesë e rindërtimit të Liverpoolit nën drejtimin e trajnerit të ri dhe si një sinjal i qartë se klubi po synon rikthimin në majat e futbollit anglez dhe evropian.
