Granit Tahiri
Mandarinat që prodhohen në Shqipëri dyshohet se kanë pesticide mbi nivelin e lejuar. Ky dyshim i ka detyruar edhe autoritetet e Kosovës që t’i ndalojnë në pikat kufitare ngarkesat me mandarina me prejardhje nga Shqipëria, derisa të merren rezultatet e analizave laboratorike.
Agjencia e Ushqimit dhe Veterinarisë ka thënë se po e monitoron situatën, pasi Sistemi Evropian i Sigurisë Ushqimore ka ngritur alarm për ngarkesat me mandarina që vijnë nga Shqipëria.
AUV ka shtuar masat e kontrollit për ngarkesat me mandarina dhe do të merren mostra për testim për të përcaktuar nëse kanë prezencë të pesticideve mbi nivelet e lejuara në mandarinë.
“AUV nga mbrëmë ka ngritur masat e nivelit të kontrollit për ngarkesat me llojin e produktit mandarinë. Të gjitha kontingjentet apo ngarkesat me këtë produkt, përveç kontrollit inspektues të detajuar, merren mostra nga secila për testim laboratorik me qëllim testimin/përcaktimin e nivelit të mbetjeve në pesticide, përfshirë (lloji i parametrit të dyshuar për testim (MRL) në Chlorpyrifos dhe phosmet),” thuhet në njoftimin e AUV-it.
AUV ka shtuar se, edhe pse Kosova nuk është përfshirë në lajmërimet e Sistemit Evropian, megjithatë ka marrë masa për të hequr dyshimet.
“Përderisa Kosova nuk është e përfshirë në lajmërimet e RASFF, masën e vendosur e bëjmë me qëllim të eliminimit të dyshimeve të ngritura… Deri tani nuk ka pasur asnjë element dyshues mbi këtë produkt,” ka thënë Agjencia më tej.
