Fatlum Berisha
Prishtinë- Policia e Kosovës (PK) njofton se në dy lokacione dhe raste të ndara mbrëmjen e së martës, arrestoi tre persona dhe sekuestroi tri armë zjarri dhe një sasi të konsiderueshme të municionit.
Në rastin e parë, thuhet se një automjet tentoi t’i shmangej ndalimit policor, por i njëjti u ndalua në Rrugën B, teksa tek dy të dyshuarit u gjetën dy armë zjarri.
“Në rastin parë njësia policore u vu në ndjekje të një automjeti i cili provoi t’i shmangej ndalimit policor dhe pas një ndjekje prej disa minutash policia arriti që në rrugë “B” në Prishtinë, të ndaloj veturën e dyshuar si dhe dy të dyshuar, me ç’ rast të dyshuarve iu gjetën dy armë zjarri”, thuhet në njoftim.
Kurse, thuhet se në rrugën “Kadri Zeka” është ndaluar një i dyshuar, të cilit iu sekuestrua arma e zjarrit.
“Në rastin e dytë, pas informacioneve të siguruar në rrugë operative se një i dyshuar posedonte armë, policia me shpejtësi ndërmori një operacion në një lokal në rrugën “Kadri Zeka” në lagjen Kalabria në Prishtinë, me ç’ rast arriti të ndaloj të dyshuarin dhe të sekuestroj një armë zjarri. Ndërlidhur me rastet, me rekomandimin e prokurorit të shtetit, policia ka iniciuar një hetim në drejtim të veprave penale “Mbajtja në pronësi kontroll ose posedim të pa autorizuar të armës”, ndërkaq me aktvendim mbi ndalimin e personit të dyshuar, të nxjerrë nga ana e prokurorit të shtetit të tre të dyshuarit janë dërguar në qendrën e mbajtjes prej 48 orësh, si vijimësi e fazave të mëtejme të procesit hetimor”, thuhet në njoftim.
