Shënjestër
Një person ka mbetur i plagosur me armë zjarri mëngjesin e sotëm rreth orës 07:00 në “Kodrën e Trimave” në Prishtinë.
Lajmin për plagosjen e ka konfirmuar Policia e Kosovës. Zëdhënësja e Policisë, Flora Ahmeti ka thënë për Shënjestër se një person është plagosur me armë zjarri nga një person tjetër i dyshuar.
“Sot rreth orës 07:00 policia ka marrë informatën për një plagosje me armë zjarri të ndodhur në lagjen Kodra e Trimave në Prishtinë. Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen ku dyshohet se nga një person është plagosur me armë zjarri dhe i njëjti është dërguar për tretman mjekësor”, ka thënë ajo.
“Aktualisht hetuesit policor në koordinim me prokurorinë, po ndërmarrin veprimet hetimore për ndriçimin e plotë të rastit”, tha Ahmeti.
Nga Emergjenca i thanë Shënjestrës se gjendja e të plagosurit është stabile.
