Barça dhe Reali matin forcat sonte në Bernabeu

El Clasico i së shtunës pritet të jetë më e zjarrta që prej largimit të Messit dhe Ronaldos nga
La Liga.

Të dy skuadrat spanjolle po kalojnë një sezon të jashtëzakonshëm, me statistika të frikshme.
Kampionët në fuqi të Spanjës dhe Evropës, Real Madridi, kanë mundësi të rrëzojnë Barcelonën nga kreu i tabelës këtë fundjavë dhe gjithashtu të ndryshojnë një pjesë të historisë.

Ata janë një ndeshje larg ecurisë më të gjatë të pamposhtur në historinë e La Liga-s, e regjistruar nga Barcelona nën drejtimin e Ernesto Valverde (43 ndeshje) midis 2017 dhe 2018.

Skuadra e Ancelottit pësoi një humbje 3-1 nga Atletico Madrid më 24 shtator 2023, por që nga ajo kohë kanë regjistruar 31 fitore, 11 barazime dhe zero humbje.

Nga ana tjetër, fitorja historike e FC Barcelonës të mërkurën ndaj Bayern Munich (4-1) konfirmoi sulmin e frikshëm të skuadrës së drejtuar nga Hansi Flick. Në total, Blaugranët kanë shënuar 43 gola në 13 ndeshje.

Trajneri i Real Madridit, Ancelotti, u pyet nga mediat nëse ka frikë nga Barcelona. Ai u përgjigj:

“Frikë?! Nuk ka asgjë që të më mbajë zgjuar natën. Barça po bën mirë, por në El Clasico nuk ka favoritë. Gjithçka varet nga performanca e skuadrave.”

Trajneri i Barcelonës tha se “mezi pret” El Clàsico e tij të parë konkurrues dhe se “nëse Real Madrid është gati, edhe ne jemi të gatshëm”:

“Kam besim tek skuadra, tek të gjithë lojtarët. El Clasico do të jetë një ndeshje e mrekullueshme. Ne kemi qasjen tonë. E patëm kundër Bayernit dhe pamë se duhet të përmirësoheshim. Në çdo ndeshje, ju përshtateni. Tani do të përshtatemi me Real Madridin, ashtu si në të gjitha ndeshjet. Loja e Real Madridit? Ata do të jenë gati dhe ne po ashtu,” u shpreh Flick.

Në të gjitha El Clasico-t, Real Madridi ka 105 fitore, Barcelona 100, dhe 52 ndeshje kanë përfunduar në barazim.