Pesë punëtorë lëndohen nga shembja e pllakës së betonit në Prizren

Të paktën pesë punëtorë janë lënduar të mërkurën, pasi një pllakë betoni është shembur në një vendpunishte në lagjen Dardania të Prizrenit.

Rasti ka ndodhur më 28 tetor, rreth orës 12:30.

Të lënduarit janë dërguar në Spitalin e Përgjithshëm të Prizrenit, ku katër prej tyre janë liruar pas trajtimit mjekësor, ndërsa njëri ka mbetur për trajtim të mëtejshëm.

Zëdhënësi i Policisë për rajonin e Prizrenit, Shaqir Bytyqi, ka bërë të ditur se informacioni për rastin është pranuar nga Emergjenca e spitalit.

Sipas të dhënave fillestare, punëtorët kanë pësuar lëndime të lehta.

Policia ka dalë në vendin e ngjarjes dhe është duke mbledhur informacione për të sqaruar rrethanat dhe shkaqet e shembjes.