Elias Krasniqi
Milani pësoi humbje 0-3 ndaj Bournemouthit në ndeshjen e tretë të fazës së ligës në Ligën e Evropës.
Kuqezinjtë pësuan gol nga penalltia që në minutën e tetë, ndërsa në minutën e 27-të mbetën me një lojtar më pak, pasi portieri Mike Maignan u përjashtua me karton të kuq.
Të dyja situatat erdhën pas goditjeve nga këndi. Maignan shtyu në fytyrë sulmuesin Adams, ndërsa sipas rregullave të reja, penalltia mund të akordohet edhe kur topi nuk është ende në lojë, nëse ndodh një shkelje që e justifikon atë.
Pas ndeshjes, trajneri i Milanit, Ruben Amorim, u shpreh i pakënaqur me mënyrën se si rrodhi takimi, duke thënë se penalltia dhe përjashtimi i portierit e ndryshuan krejtësisht ndeshjen.
“Penalltia pas goditjes nga këndi dhe kartoni i kuq ndryshuan gjithçka. Nuk pati fare lojë. Nuk patëm kohë të rikuperoheshim pas penalltisë së parë. Kah fundi u përpoqëm të sulmonim, por goli i tretë e bëri edhe më të vështirë situatën tonë”, deklaroi Amorim, sipas “Football Italia”.
I pyetur për përjashtimin e Maignan, trajneri pranoi se skuadra duhej të kishte shmangur situata të tilla.
“Është e vërtetë, nuk mund ta bëjmë këtë. Duhet t’i mbajmë 11 lojtarë në fushë. Kemi lojtarë më me përvojë, por tani duhet të rikuperohemi dhe të përgatitemi për ndeshjen e radhës. Kur luan me dhjetë lojtarë, duhet të vraposh shumë dhe të përpiqesh të bësh presion në momentin e duhur. Sot gjithçka ishte negative, nga çdo këndvështrim”, tha ai.
Amorim vendosi të mos e ndryshonte skemën me tre mbrojtës qendrorë, edhe pse Milani u detyrua të mbrohej më shumë pas përjashtimit të portierit.
“Para së gjithash, lojtarët e dinë si të mbrohen në këtë mënyrë. Siç thashë, në minutat e fundit u përpoqën të dilnin përpara, ndërsa gjatë pjesës tjetër të ndeshjes nuk morën shumë rreziqe. Mundohem t’i vendos lojtarët në kushtet më të përshtatshme për ta dhe të ndryshoj rrjedhën e ndeshjes përmes zëvendësimeve”, shpjegoi trajneri.
Amorim u pyet edhe nëse kishte biseduar me Maignan pas kartonit të kuq.
“Jo, nuk pata kohë. Tani duhet të kthehem në Milano për t’u përgatitur për ndeshjen e radhës kundër Udineses. Do të flasim për këtë kur të kthehemi”, u përgjigj ai.
Milani kishte shfaqur probleme edhe në fundjavë ndaj Atalantës, kur rrezikoi të shpërdoronte epërsinë prej 3-0 në San Siro, para se ta fitonte ndeshjen 3-2.
Tani skuadra duhet të rikuperojë pikët e humbura në Ligën e Evropës, pasi ka pësuar dy humbje në tri ndeshjet e para. Kuqezinjtë e humbën edhe ndeshjen hapëse në shtëpi ndaj Benficës me rezultat 0-2.
I pyetur se si e vlerëson situatën pas 100 ditësh në krye të Milanit, Amorim tha se skuadra ndodhet në një fazë tjetër nga ajo që përfaqëson historia e klubit.
“Është pjesë e rrugëtimit tonë. Nëse e shikoni historinë e Milanit, ne jemi në një fazë tjetër tani. Fabio Capello flet për historinë e Milanit dhe unë e kuptoj këtë, por duhet të jemi realistë. Më pëlqeu mënyra se si luftuam. U përpoqëm të bënim diçka dhe ta ndihmonim njëri-tjetrin. Duhet të mësojmë nga këto momente dhe të kuptojmë se ky është futbolli”, përfundoi Amorim.
